You are here
Home > ၶၢဝ်ႇ > ၵၢၼ်သိုၵ်း > ၶွင်ႇၸီႇဢဝ်ၶိုၼ်းၸိုင်ႈတႆး(RCSS) ၶႃႈႁႅမ်တၢႆၵူၼ်းမိူင်း ၸိူဝ်းဢမ်ႇမီးတၢင်းၽိတ်း

ၶွင်ႇၸီႇဢဝ်ၶိုၼ်းၸိုင်ႈတႆး(RCSS) ၶႃႈႁႅမ်တၢႆၵူၼ်းမိူင်း ၸိူဝ်းဢမ်ႇမီးတၢင်းၽိတ်း

December 23,2019
By – သႅင်ၸိုင်ႈ
ၼႂ်းလိူၼ်တီႇၸိမ်ႇပႃႇ ပီႊ 2019 ၼီႊ ၼႆႉ ၶွင်ႇၸီႇဢဝ်ၶိုၼ်းၸိုင်ႈတႆး(RCSS) လႆႈၶႃႈ ႁႅမ်တၢႆၵူၼ်းမိူင်း ၼႂ်းဢိူင်ႇမိူင်းမူႉ ၸေႈဝဵင်းၼမ်ႉတူႈ၊ ဢိူင်ႇမိူင်းၼၢင်း ၸေႈဝဵင်းၵေး သီး၊ ဢိူင်ႇမိူင်းတၢင်ႈ ၸေႈဝဵင်းၵျွၵ်ႉမႄး ၸိူဝ်းၼႆႉဝႃႈၼႆ။
ၼႂ်းလိူၼ်တီႇၸိမ်ႇပႃႇ 23 ပီႊ 2019 ၼီႊ ယၢမ်း 9:45 မူင်းၼၼ်ႉ ၸၢႆးထေးဢွင်ႇ ၸၢဝ်းၶိူဝ်းတႆး ပဵၼ်ၽူႈၶဝ်ႈၸုမ်းပႃႇတီႇသၢင်ႇသီႇ လႆႈထုၵ်ႇၶွင်ႇၸီႇဢဝ်ၶိုၼ်းၸိုင်ႈတႆး (RCSS) ယိုဝ်းတၢႆထၢင်တီႈ ဢွင်ႈႁိူၼ်းဝၢၼ်ႈႁူၺ်ႈလူင်(ၼႃးမူၼ်း) ဢိူင်ႇမိူင်းတၢင်ႈ ၸေႈဝဵင်းၵျွၵ်ႉမႄး ၼႆယူႇ။
မႅၼ်ႈမိူဝ်ႈၸၢႆးထေးဢွင်ႇ တိုၵ်ႉဢဝ်သေႃးၵႃးၼႂ်းႁိူၼ်းသေ ဢွၵ်ႇမႃးၼူဝ်းၵႃးယူႇ ၼၼ်ႉ ၵိုင်ႉၵၢင်ႇလႆႈထုၵ်ႇ ၸုမ်းသိုၵ်းၶွင်ႇၸီႇဢဝ်ၶိုၼ်းၸိုင်ႈတႆး RCSS (2)ၵေႃႉ ၶီႇ လူတ်ႉၶိူင်ႈသေ ထၢမ်ႇၵႂၢမ်းတႆးဝႃႈ “ ႁိူၼ်းၸၢႆးထေးဢွင်ႇပဵၼ်လင်လႂ်” ၼႆယူႇ။ ၸၢႆး ထေးဢွင်ႇလၢတ်ႈဝႃႈ “ ပဵၼ်ၶႃႈၼႆႉယဝ်ႉ ၸၢႆးထေးဢွင်ႇ” ၼႆလႄႈ ၵူၼ်းၶီႇလူတ်ႉၶိူင်ႈ (2)ၵေႃႉၼၼ်ႉ လႆႈဢဝ်ၵွင်ႈပွတ်းယိုဝ်းသႂ်ႇ တူဝ်ၸၢႆးထေးဢွင်ႇ မွၵ်ႈ(10)ယဝ်ႉ ၼႅတ်ႈ ပိၼ်ႇႁူဝ်လူတ်ႉၶိူင်ႈ ႁေႃႈလႅၼ်ႈၵႂႃႇတၢင်းသၼ်လွႆၽၢႆႇၸၢၼ်းဝၢၼ်ႈၼႃးမူၼ်း ၼႆ ယူႇ။ ၸၢႆးထေးဢွင်ႇၼႆႉ ဢႃႇယူႉမီးမွၵ်ႈ(40)ၶူပ်ႇသေ ပဵၼ်လုၵ်ႈၸၢႆးလုင်း တေႃးၼႃႉ (သၢင်ႇပီး)လႄႈ မႄႈပႃႈဢိင်ႇသေ လႆႈမီးလုၵ်ႈႁူမ်ႈၵၼ်တင်း ၼၢင်းၶိၼ်ႇၸိင်ႇ(ႁိုဝ်) ၼၢင်းလွတ်ႈ(1)ၵေႃႉ ၸိုဝ်ႈႁွင်ႉၼၢင်းယုယုလုၼ်ႇ ဢႃႇယု(8)ၶူပ်ႇ ၼႆယူႇ။

ၶႅပ်းႁၢင်ႈ – လုင်းၸၢႆးထေးဢွင်ႇ ၵေႃႉဢၼ်ထုၵ်ႇ(RCSS) ဢဝ်ၵွင်ႈယိုဝ်းတၢႆ ၼႂ်းဝၼ်းထီႉ – 23.12.2019


မိူဝ်ႈယၢမ်း 11:00 မူင်းၼႆႉၵေႃႈ ၸဝ်ႈႁၢၼ်/ ဢွင်ႇပျေႉၸုင်ႇ ၽူႈၵွၼ်းတပ်ႉၵွင် ၶလရ(501) ပႃႈတႂ်ႈၵုမ်းၵမ် ၸၵၶ(1) ၵျွၵ်ႉမႄး တိူင်းသိုၵ်းလႃႈသဵဝ်ႈ လႆႈၵႂႃႇၵူတ်ႇ ထတ်းတူၺ်း ဢွင်ႈ တီႈပဵၼ်ပၼ်ႁႃ ၶႃႈႁႅမ်ၸၢႆးထေးဢွင်ႇတၢႆၼၼ်ႉယူႇ။
လႆႈႁူႉဝႃႈ ၼႂ်းၼႃႈတီႈသၼ်လွႆဝၢၼ်ႈၼႃးမူၼ်း ဢိူင်ႇမိူင်းတၢင်ႈ ၸေႈဝဵင်းၵျွၵ်ႉမႄးၼႆႉ မီးသၢႆသိုၵ်းတူင်ႉၼိုင် ၶွင်ႇၸီႇဢဝ်ၶိုၼ်းၸိုင်ႈတႆး(RCSS) ဢဝ်ႁူမ်ႇလူမ်ႈဝႆႉသေ ၽၢႆႇ သိုၵ်းမၢၼ်ႈ တပ်ႉၶလရ(501) ပႃႈတႂ်ႈၵုမ်းၵမ် ၸၵၶ(1) လႆႈဢဝ်ႁူမ်ႇလူမ်ႈဝႆႉ တီႈၵျွင်း မုၼ်ၸဝ်ႈဝၢၼ်ႈလူင်(မိူင်းတၢင်ႈ)ၼႆယူႇ။
ပူၼ်ႉမႃးၼႂ်းလိူၼ်တီႇၸိမ်ႇပႃႇ 19 ဝၼ်း ပီႊ 2019 ၼီႊၼၼ်ႉၵေႃႈ တပ်ႉၸုမ်း(505) ၶွင်ႇၸီႇဢဝ်ၶိုၼ်းၸိုင်ႈတႆး(RCSS) လႆႈယိုဝ်းၸၢႆးသၢမ် ဢႃႇယူႉ(40)ၶူပ်ႇ ပဵၼ်လုၵ်ႈ ၸၢႆးပူႇၼၼ်ႇတေႃးလႄႈ ပႃႈမူၼ်း ယူႇဝၢၼ်ႈၼမ်ႉမေႃႇသၢႆး ဢိူင်ႇမိူင်းၼၢင်း ၸေႈဝဵင်း ၵေးသီး ၼႆယူႇ။
ၸၢႆးသၢမ်ၼႆႉ မီးလုၵ်ႈႁူမ်ႈၵၼ်တင်း ၼၢင်းမူၼ်း(3)ၵေႃႉ ယိင်း(1) ၵေႃႉ ၸၢႆး(2)ၵေႃႉ ႁူမ်ႈ(3)ၵေႃႉၼႆသေ လႆႈထုၵ်ႇသိုၵ်းၶွင်ႇၸီႇဢဝ်ၶိုၼ်းၸိုင်ႈတႆး ထၢင်ႇထိူမ်ဝႃႈ ၵဵဝ်ႇယႃႈ မဝ်းၵမ်ၼႆသေ ဢဝ်ၵွင်ႈပိုတ်းယိုဝ်းၶႃႈႁႅမ်တၢႆ ဝႃႈၼႆ။
ယွၼ်ႉမၢၵ်ႇၵွင်ႈတိူဝ်ႉၺႃး တီႈႁူဝ်မႃႇၽၢႆႇသၢႆႉလႄႈ ၼႂ်းလိူၼ်တီႇၸိမ်ႇပႃႇ 20 ဝၼ်း ပီႊ 2019 ၼီႊ ယၢမ်းၵၢင်ၼႂ် 8:00 မူင်းၼၼ်ႉ ၸၢႆးသၢမ် လႆႈသဵင်ႈၵၢမ်ႇၵႂႃႇ ၼႆယူႇ။
ပူၼ်ႉမႃးၼႂ်းလိူၼ်တီႇၸိမ်ႇပႃႇ 16 ဝၼ်း ပီႊ 2019 ၼီႊၼၼ်ႉၵေႃႈ သိုၵ်းၵူၼ်းမိူင်း ၸိုဝ်ႈႁွင်ႉၸၢႆးၵျေႃႇ ယူႇဝၢၼ်ႈၵွင်းလၢင်း ဢိူင်ႇမိူင်းမူႇ လႆႈၵႂႃႇလႄႇထိူၼ်ႇ ၽႃႇၺႃး မၢၵ်ႇ ၶွင်ႇၸီႇဢဝ်ၶိုၼ်းၸိုင်ႈတႆး(RCSS) တီႈၵွင်ႈၼမ်ႉႁၢဝ်းၶဝ်ႈ ၽၢႆႇတူၵ်းဝၢၼ်ႈၵွင်း လၢင်းလႄႈ လႆႈထၢင်တီႈၵႂႃႇယူႇ။
ၼႂ်းလိူၼ်တီႇၸိမ်ႇပႃႇ 16 ဝၼ်း ပီႊ 2019 ၼီႊၼႆႉၼင်ႇၵဝ်ႇ ၸဝ်ႈသြႃႇလႄႈၵူၼ်းမိူင်း ဝၢၼ်ႈလွႆ ယွၼ်းၵႂႃႇပွႆးသၢင်းၵျူဝ်ႇ ၸဝ်ႈသြႃႇလွၼ်ႇ တီႈဝၢၼ်ႈႁၢႆးၶမ်း ၶွင်ႇၸီႇဢဝ် ၶိုၼ်း ၸိုင်ႈတႆး(RCSS) ဢမ်ႇပၼ်ၵႂႃႇ။ ၸဝ်ႈသြႃႇလႄႈ မုၼ်ၸၢင်း(2)ပႃး ယွၼ်ၶႂၢင်ႉ ၵႂႃႇၵေႃႈလၢတ်ႈဝႃႈ “ ပေႃးၵႂႃႇၵေႃႈ ယႃႇပေၶိုၼ်းမႃး” ဝႃႈၼႆလႄႈ ၸဝ်ႈသြႃႇ ၶဝ်ၵေႃႈ ဢမ်ႇႁတ်းၵႂႃႇၼႆယူႇ။

Top